محمد عادل - قصتي بعد 8 شهور سكن فمدينة الشروق

النهاردة أكون كملت ٨ شهور بالتمام في الشروق

٨ شهور قدرت فيهم أكون صورة واقعية وكاملة عن الحياة هنا

أولا .. في حاجة في كيمياء المخ اتغيرت .. يعني مزاجي اصبح مرتبط بالشروق .. بهدوءها وسلاسة الحياة فيها .. وبقى مشوار شغلي لمدينة نصر عبارة عن اختبار تحمل للحياة خارج الشروق .. وبفشل فيه بجدارة

ثانيا .. عمري ما هنسى تجربة ادخال عداد النور .. كان ليها الدافع الأكبر لحبي للشروق .. أروح شركة الكهرباء عشان اغير العداد يقولولي لازم عقد ايجار موثق .. اطلع من عندهم على الشهر العقاري وبعدين اخلص وارجعلهم .. وبعدين يطلع عليا مبلغ تراكمي مش معايا .. اطلع من عندهم على البيت اجيب فلوس وارجعلهم .. في النهاية خلصت كل حاجة في يوم واحد .. انا لو في مدينة نصر كان جالي اعراض الشيخوخة قبل ما اخلص اللفة دي كلها .. الشروق نعمة

كل مافتكر كارفور المعادي و كارفور هنا اقول الشروق نعمة .. كان زماني لسة واقف ع الكاشير من ٢٩ شعبان

متعة ان مدرسة الاولاد جنب البيت لا يضاهيها متعة

متعة ان فكرك يتغير وتوافق ان المدام تسوق لان السواقة هنا سهلة .. برضه لا يضاهيها متعة

متعة انك عارف جيرانك بالاسم كانت اكتشاف .. انا كنت في برج فيه ٦٦ شقة .. دلوقتي كلنا ٧ 

جروبات الشروق والناس اللي حابة تخدم وتساعد .. والروح الجميلة .. الناس في مدينة نصر من كتر الزحام والضوضاء قلبت زومبي وكان طبيعي انك تلقى اتنين بيمصوا دم جارهم وبياكلوا لحمه جهارا نهارا

حتى السلبيات هنا متقبلة .. كنت في الدور السابع في مدينة نصر .. فالمياه وهي موجودة كانت نسبة وصولها ليا ضعيفة ومعتمدة على المواتير و جرب الجيران وبعدهم عن الاستحمام ... هنا المياة لما بتقطع تقطع ولما بتيجي تيجي .. القصة بسيطة

شايف تحسن والحمد لله في الكهرباء عن أيام مدينة نصر

الصرف كان ازمة سودة في البرج اللي كنت عايش فيه .. هنا الوضع متميز

الخلاصة .. الحمد لله ان وفقني لاختيار الشروق ورزقني القدرة على الشراء فيها .. ومن متابعتي للاشهر اللي فاتت .. شايف معدل التحسن في الخدمات والمرافق معقول .. صحيح احنا لسة بعيد عن الكمال .. لكن الواحد حابب الكفاح مش كاره نفسه والعيشة واللي عايشنها

كل سنة وانتو طيبين